ع ع
كتب هشام الملولي تدوينة حول طريقة وخطوات استرجاع الهواتف المسروقة، جاء فيها :
أي واحد فينا تشفر ليه تيليفون اولى كيعرف شي واحد تسرق ليه ، ولكن قليل فينا لي كيعرف شي واحد ديكلارا اي دار شكاية عند الشرطة . هاد الشي هو الديفوا لي كنديروا .
كل واحد فينا كيسمع بالشرطة العلمية ولكن عمرنا مكملنا الجملة وقلنا الشرطة العلمية والتقنية .
اجي نفصلوا هاد التقنية مزيان ؟
التقنية أي مواكبة التقنيات الحديثة من اجهزة وحواسيب او غيرها ، الشرطة التقنية عندهم مصلحة مكلفة فقط بتتبع الهواتف وفك تشفيرها ومراقبة المكالمات .
الشفار ملي كيسرق كيفورماطي التيليفون وكيخدم نمرة من نوامر ديال هاد البلاد ، ملي كتخدم اي نمرة فالتيليفون راه اتوماتيكياً كتعرف عند الشرطة التقنية او ANRT .
غادين تقولوا كيفاش عرفوا النمرة جرب تركب فالتليفون ديالك (#06#*)، غادي يطلع ليك واحد الرقم سميتوا الايمي ، هاد الرقم لي طلع ليك عندك نتا بوحدك فالعالم كامل او ميمكنش يتبدل .. لحد الساعة تفاهمنا ، مزيان .
اذن كنطلب من اي واحد يحط هاد الرقم فالأجوندا ديالوا ، ولي معندوش كونطرا ديال لاكارط سيم يمشي يديرها .
الأن تشفر ليك تيليفون ونتا عندك هاد جوج سوارت شنو غادي دير ؟
اولا غادي تسول فين كاين لابيجي ديال البوليس واي مدينة فيها البوليس عندها مركز ديال لابيجي، غادي توجه عندهم وغادي تدير شكاية انك تشفرتي بالسلاح الابيض او اي عنف واجهك وغادي تقوليهم عندي الرقم التسلسلي ديال الهاتف غادين ياخدوه وغادين اي سايفطوه لشرطة العلمية والتقنية او من بعد ايام غادين يعيطوا ليك وغادين يجبدو ليك اخر الارقام والمحادثات وغادي يتسناو منك تقوليهم هذا تليفوني
من بعد غادين يجيبوا الشفار ولا لي شراه من عندوا في حالة التماطل كاين وكيل الملك كاتدير عندو شكاية وكاتابع الملف ديالك بطريقة قانونية .
ورد امين رغيب على الشرطي الملولي وكتب التدونية التالية :
السيد سيمتو الشرطي الملولي دار واحد التدوينة في حسابو على الفيسبوك كايشرح للمغاربة كيفاش إيديرو باش إرجعو التيليفون إيلا تسرق . ودابا السيد شرطي الناس ايقراو هاشي ايسحابهوم راه الشرطة داكشي لي كاتدير وغادي مشيو غالطين . لهذا وجب التنبيه
طبعاملي قريت هاد العنوان لي فصورة ڭلت ارا نقرا ديك التدوينة نشوف شنو فيها نستافد شنو هما الإجراء ات القانونية دخلت لقيت السيد كايهضر فشي حوايج لاعلاقة وكاتبين ان هاد السيد مامعتمد على حتى مصدر من الشرطة العلمية و التقنية لانو إلا كان بالفعل عتامد عليهوم فهاد المعلومات ماكانش إحط مجموعة من المغالطات . اولا هاد السيد هضر على الشرطة التقنية وشبها بـ (ANRT) حيث قال : “ملي كتخدم اي نمرة فالتيليفون راه اتوماتيكياً كتعرف عند الشرطة التقنية او (ANRT) وهادي مغالطة كبيره الشرطة التقنية شيئ و الوكالة الوطنية لتقنين الإتصال شيئ آخر .
والدور ديال الوكالة الوطنية ماشي هو تعقب الهواتف ويلا اي مواطن دخل للموقع الرسمي لهاد الوكالة ومشا كليكا على المهام غادي لقا بينما ماكينا حتا علاقة فهادشي لي قال السيد .الوكالة ومن خلال الاسم ديالها تقنن الإتصالات فقط ولاعلاقة لها مع التعقب او التجسس …
2 عملية التعقب وتتبع كاتكون على مستوى شركة الإتصال بحد ذاتها ولكن هادشي ماكايعنيش انو الشرطة التقنية والعلمية مميكنش ليها كذلك التعقب الهواتف إما عن طريق التعاون مع شركات الإتصال او بإستعمال تقنيات خاصة بها ولكن كاتبقى محدودة إلى حد ما .
( لوكان هاد القاضية متاحة ڭاع ماتلقا المكتب الفيديرالي FBI كايدابز باش إفك شفرة الايفون وكاتسمع فضائح الـ NSA اناهوم عندهوم علاقة مشبوهة مع شركات الإتصال ( هادو ميريكان الله يرحم الواليدين )
المغالطة الثانية لي عند المغاربة ولي حتى السيد هشام وقع فيها مع الاسف : ادين تقولوا كيفاش عرفوا النمرة جرب تركب فالتليفون ديالك (#06#*)، غادي يطلع ليك واحد الرقم سميتوا الايمي ، هاد الرقم لي طلع ليك عندك نتا بوحدك فالعالم كامل او ميمكنش يتبدل .. لحد الساعة تفاهمنا ، مزيان”.
قال السيد هشام انو هاد الرقم التسلسلي مايمكنش إتبدل : وهذا خطأ كبيييير ، هاد الرقم اولا بالفعل هو كيعرف الهاتف وكايكون إونييك ولكن ممكن إتبدل بحال مثلا ملي كاتدير ديكوداج لتليفون ، نمشيو اعمق مثلا هواتف السامسونغ راه كاين جهاز سميتو SPT box . وهناك عدة اجهزة …
يعني المغاربة ماتمشيوش غالطين انا براسي لا مشا ليا تيليفون غادي نديكلاري ولكن مغاديش نكون متأكد 100% غادي رجع فقط لانو عندي الايمي . هادشي لي كاين وكانستغل هاد الستاتو باش نسلم على سي هشام ونقوليه تبارك الله عليك في تدخلاتك الامنية ، حفضك الله .
